Ailddatblygu hen safle Clwb Cymdeithasol ac Athletau’r Tyllgoed

Bydd y datblygiad newydd yn darparu cartrefi teulu fforddiadwy newydd a ddyluniwyd i fodloni safonau ynni-effeithlon uchel y Cyngor. Byddant ar gael i’w rhentu i bobl ar y rhestr aros Tai Cyngor a byddant yn cynnwys cartrefi 2, 3 a 4 ystafell wely.

Bydd y cynllun hefyd yn cynnwys byngalo i oedolion sydd ag anawsterau dysgu. Bydd hwn yn cael ei staffio 24 awr y dydd i helpu preswylwyr i fyw’n annibynnol.

Bydd y cynllun yn cynnwys System Draenio Dinesig Cynaliadwy (SDC) sy’n cynnwys gerddi glaw, plannu coed a seilwaith gwyrdd arall sy’n sicrhau bod dŵr glaw yn draenio’n naturiol i’r ddaear. Mae hyn yn helpu i fynd i’r afael ag effeithiau newid hinsawdd, yn darparu lleoedd gwyrddach a mwy deniadol i fyw ynddynt, ac yn cynyddu bioamrywiaeth leol.

Bydd y prosiect yn symud ymlaen mewn pedwar cam allweddol (gweler isod).  Ar hyn o bryd rydym ar Gam 3:

Cam 1 Gwaith arolygu a chasglu gwybodaeth (Cwblhawyd):

Mae’r cam hwn yn cynnwys cynnal yr holl waith arolygu angenrheidiol ar y safle, fel arolygon coed, ecoleg a chyflwr safle.  Maent yn dweud popeth sydd angen i ni ei wybod am y safle i helpu i lunio dyluniad y datblygiad arfaethedig.  Dechreuodd y rhain yn 2020 ac mae’r diweddariadau yn parhau.

Cam 2 (Cwblhawyd):

Mae Cam 2 yn cynnwys defnyddio’r gwaith arolygu i nodi’r cyfleoedd a’r cyfyngiadau ar y safle a chynnig rhai syniadau cychwynnol a dyluniadau cynnar ar gyfer y datblygiad arfaethedig.

Gwnaethom wynebu cyfyngiadau sylweddol ar y safle wrth reoli’r cam hwn, a wnaeth gynnwys trafodaethau manwl gydag ystod o arbenigwyr technegol i allu datblygu opsiwn ymarferol ar gyfer y dyluniad.

Cam 3 Opsiwn a Ffefrir (I’w gwblhau yn 2024):

Mae’r cam hwn yn cynnwys datblygu’r opsiwn ymarferol yn fanylach, yn barod ar gyfer cais cynllunio. Bydd y cam hwn yn cynnwys Ymgynghoriad Cyn Ymgeisio (YCY) gyda’r gymuned a rhanddeiliaid eraill.

Dyma gyfle i chi ddweud wrthym beth yw eich barn ar y cynllun cyn i ni ei gyflwyno i’r Awdurdod Cynllunio Lleol fel cais cynllunio.

Bydd set lawn o gynlluniau ac adroddiadau am y datblygiad arfaethedig ar gael o ddechrau’r ymgynghoriad yn www.amityplanning.co.uk o Ddydd Gwener 8 Tachwedd 2024.

Hoffem glywed eich barn, a dyma sut y gallwch gysylltu â ni:

E-bost: info@amityplanning.co.uk

Ffôn: 07498 915610

Fel rhan o’r broses ymgysylltu, rydym yn cynnal digwyddiad arddangos cyhoeddus ddydd Iau 28 Tachwedd, rhwng 2pm a 7pm yn Hyb y Tyllgoed, Rhodfa Doyle, Caerdydd, CF5 3HU wrth ymyl y safle datblygu. Mae croeso i bawb sydd â diddordeb.

Y dyddiad cau ar gyfer cyflwyno unrhyw sylwadau yw Dydd Gwener 6 Rhagfyr 2024.

Cam 4 Cais Cynllunio (2024/5):

Gobeithiwn allu cyflwyno cais cynllunio ar gyfer y datblygiad arfaethedig yn gynnar yn 2025. Bydd y gymuned a rhanddeiliaid eraill yn cael cyfle i roi sylwadau pellach ar y cynigion bryd hynny.

Rydym am glywed eich barn ar le rydych chi’n byw, beth sy’n bwysig i chi fel trigolion a’n syniadau ar gyfer y datblygiad.

Rydym yn awyddus i gael barn pobl leol ac wedi trefnu sesiwn galw heibio –

28 Tachwedd, 2-7pm yn Hyb Llyfrgell y Tyllgoed, Rhodfa Doyle, CF5 3HU, – i rannu a thrafod ein cynigion gyda chi.

Gallwch gysylltu â ni am y datblygiad ar unrhyw adeg drwy’r blwch post datblygu tai DatblyguTai@caerdydd.gov.uk.

A yw Clwb Cymdeithasol ac Athletau’r Tyllgoed yn dal i weithredu?

Rhoddodd y Clwb y gorau i fasnachu yn 2018.

Pwy sy’n berchen ar y tir?

Cyngor Caerdydd sy’n berchen ar y tir.

Beth fydd yn digwydd i’r mast telathrebu sydd wedi’i leoli ar adeiladau’r Clwb ar hyn o bryd?

O dan delerau’r brydles, bydd y mast telathrebu yn cael ei symud.

Pryd fydd yr adeiladau’n cael eu dymchwel?

Pan fydd y dyluniad wedi’i ddatblygu a lleoliad newydd wedi’i gytuno a’i adeiladu ar gyfer y mast telathrebu, yna gellir dymchwel yr adeiladau.

A allaf gael fy ystyried am gartref?

I gael eich ystyried, ewch i Tai ar-lein