Siopau Insole, Gwelliannau Amgylcheddol

Mae Cyngor Caerdydd yn bwriadu gwneud gwelliannau i ardal siopa Insole fel rhan o raglen y Cynllun Adnewyddu Cymdogaethau (CAC). Nodwyd nifer o faterion i ddechrau, gan gynnwys:

• Ardal barcio a threfniant priffyrdd dryslyd
• Palmentydd a lôn gerbydau o ansawdd gwael
• Mynediad i gerddwyr a beiciau
• Diffyg gwyrddni ac amgylchedd o ansawdd gwael
• Goleuadau

Paratowyd cynlluniau drafft ar gyfer gwelliannau amgylcheddol yn seiliedig ar y materion uchod a chynhaliwyd dau ddigwyddiad ymgynghori cyhoeddus ar y safle ym mis Tachwedd 2023. Roedd adborth o’r digwyddiadau ymgynghori yn helaeth ac yn gadarnhaol ar y cyfan.  Roedd sylwadau’n ymwneud â’r ffaith bod y system barcio bresennol yn anhrefnus, yn wael ac yn beryglus; yr amgylchedd yn wael i gerddwyr (gan gynnwys y lôn gefn) a draenio yn broblem fawr. Cafwyd cefnogaeth gyffredinol i’r system unffordd arfaethedig. Nododd yr ymatebwyr nad yw’r parcio’n cael ei ddefnyddio’n gyffredinol gan bobl sy’n ymweld â’r siopau a bod yr ardal yn cael ei defnyddio ar hyn o bryd fel llwybr byr i Heol Trelái.

Codwyd pryderon ynghylch y ‘gwaharddiad ar droi i’r dde’ arfaethedig ac effaith bosib parcio gormodol ar y strydoedd cyfagos. Codwyd pryderon pellach am y potensial ar gyfer ymddygiad gwrthgymdeithasol oherwydd y fainc arfaethedig a’r gostyngiad canfyddedig mewn mannau parcio ceir. Codwyd yr angen am fannau parcio â chyfyngiadau amser nifer o weithiau, yn ogystal ag ansawdd gwael y lôn gefn (wyneb a goleuadau).

Roedd yr ymatebwyr o blaid darparu mwy o finiau, stondinau beiciau a phlanwyr ac rydym wedi cadw’r rhain fel rhan o’r cynllun. Roedd darparu mainc yn fater mwy dadleuol. Rydym wedi cadw’r fainc arfaethedig oherwydd y budd posib i gerddwyr, yn enwedig y rheini sydd â phroblemau symudedd a byddwn yn monitro ei defnydd parhaus.

Felly, mae’r cynllun newydd yn dangos y canlynol:

• System barcio ddiwygiedig
• Atgyweiriadau i’r lôn gefn (wedi’u cwblhau)
• Cadw’r system unffordd gyda gwaharddiad ar droi i’r dde
• Cadw’r man parcio arfaethedig i bobl anabl
• Cyfyngiadau amser ar fannau parcio (sy’n cael eu hystyried ar hyn o bryd)
• Amgylchedd mwy cyfeillgar i gerddwyr
• Biniau, planwyr, meinciau a stondinau beiciau